top of page

40 ANNI L'ARCUSGI IN CUNCERTU | 8 ET 9 MARS BIGUGLIA



U gruppu L'ARCUSGI hè felice di prupone un spettaculu novu à u « Spaziu culturale CARLU ROCCHI » di Biguglia, l’8 è u 9 di marzu, per l’anniversariu di i so 40 anni di scena. Dapoi a so creazione in 1984 in u rughjone di Bastia è di A Marana, L'ARCUSGI viaghja à nant'à u caminu apertu da i primi gruppi culturali di u Riaquistu.

L'ARCUSGI canta a Corsica è e so specificità, a terra, a cultura, a lingua ma militeghja dinù à traversu i so canti per u drittu à l’autodeterminazione di u so populu. In l'anni Ottanta Quattru / Ottanta Cinque, u nome di L’ARCUSGI (datu da Nunziu GRISONI) hè statu sceltu in umaggiu à i suldati di Pasquale Paoli, tandu armati d’arcusgi per difende a ghjovana nazione Corsa.

Fidu à e so idee è cun listessa fede, L'ARCUSGI mantene a so strada, è ferma sulidariu cun tutt’i populi in lotta, fendu una piazza impurtante ind'è so creazione à u Paese Bascu, di sicuru, ma dinù à a Catalunia, à a Scozzia è à tant’altri.Essendu in brama di ritruvà u so publicu chi porta tantu calore umanu è vulendu sparte una volta di più stonde colme d’allegria, di fratellanza è di sulidarità, l’Arcusgi vi dice à prestu nant'à a scena di u « U SPAZIU CULTURALE CARLU ROCCHI » per festighja i so 40 anni ! 


bottom of page